Paris 2024 Olimpiya Oyunlarının beynəlxalq tərəfdaşı Procter&Gamble şirkəti Azərbaycan milli komandasının bu oyunlarda iştirakını dəstəkləyəcək.
Qlobal şirkət bu barədə Azərbaycan Respublikası Milli Olimpiya Komitəsi (MOK) və Azərbaycan Respublikası Milli Paralimpiya Komitəsi (MPK) ilə müqavilə imzalayıb. Müqaviləyə Procter&Gamble şirkətinin Qafqaz və Orta Asiya Respublikaları üzrə baş direktoru İrakli Qabriadze, MOK vitse-prezidenti Çingiz Hüseynzadə və MPK prezidenti Hidayət Abdullayev imza atıb. İmza mərasimində tərəflərin rəhbərlik və təmsilçiləri, idmançılar və media nümayəndələri iştirak edib.
Müqavilə çərçivəsində Procter&Gamble şirkəti Azərbaycanı təmsil edən idmançıların Olimpiya və Paralimpiya Oyunlarında iştirakını təmin etmək üçün müəyyən öhdəliklər yerinə yetirəcək. Bundan başqa, olimpiya oyunlarında Azərbaycanı təmsil edəcək idmançılar Procter&Gamble şirkətinin marketinq fəaliyyətlərində iştirak edəcəklər. Azərbaycanda fəaliyyətinin 25 illiyinə həsr edilmiş bu müqaviləyə əsasən, şirkət 13 paralimpiyaçı və 12 olimpiyaçı olmaqla, 25 atleti dəstəkləyəcək.
Procter&Gamble şirkətinin Qafqaz və Orta Asiya Respublikaları üzrə baş direktoru İrakli Qabriadze bildirib ki, P&G 2012-ci ildə London Olimpiya Oyunlarında Milli Olimpiya Komitəsinin, 2020-ci ildə Tokio Olimpiya Oyunlarında Milli Paralimpiya Komitəsinin “Məğrur tərəfdaş”ı, “Bakı-2015” Avropa Oyunlarında birinci rəsmi tərəfdaş olub. İmzalanmış müqavilələr uşaq və gənclər arasında idmanın populyarlaşmasına töhfə verməklə yanaşı, olimpiya oyunlarında iştirak edən idmançıların dəstəklənməsinə xidmət edib. MOK-la əməkdaşlıq nəticəsi kimi, idmançıları həvəsləndirən “Anam üçün” reklam çarxları, yeniyetmələr üçün olimpiya düşərgələri, MPK ilə birgə həyata keçirilən, “Tokio 2020”-nin paralimpiyaçı çempionlarının iştirakı ilə gənc qızları idmanı dayandırmamağa səsləyən #OyunaDavam kampaniyası Azərbaycanda bu gün də uğurlu marketinq addımlarından sayılır.
“Biz çox şadıq ki, Azərbaycanda fəaliyyətimizin 25-ci ildönümündə biz bir daha milli komandanı Olimpiya və Paralimpiya Oyunlarında dəstəkləmək şansı qazanırıq. Bir müddət əvvəl biz əfsanəvi “Neftçi” Futbol Klubu ilə sponsorluq sazişi imzaladıq. İdman sahəsində bu əməkdaşlıqlar şirkətimizin Azərbaycan gəncləri arasında sağlam həyat tərzinin təbliğinə verdiyi bir töhfədir. Paris 2024 Olimpiya və Paralimpiya Oyunlarında Azərbaycan komandasını dəstəkləməklə isə 25 ildən bəri fəaliyyətdə olduğumuz ölkənin adının yüksəlməsində qatqımız olmasını istəyirik. Əminik ki, milli yığma bu dəfə də yüksək nəticələri ilə bizi sevindirəcək,” – İrakli Qabriadze əlavə edib.
Milli Olimpiya Komitəsinin vitse-prezidenti Çingiz Hüseynzadə belə əməkdaşlıqların ölkədə idmanın inkişafı üçün böyük uğur olduğunu bildirib: “Bu gün Azərbaycan Olimpiya nailiyyətləri və ev sahibliyi etdiyi beynəlxalq yarışlarla dünya idmanının mərkəzlərindən birinə çevrilib. Beynəlxalq Olimpiya Komitəsinin (IOC) prezidenti Tomas Baxın, Avropa Olimpiya Komitəslərinin prezidenti Spiros Kopralosun ölkəmizə səfərləri və bir sıra önəmli görüşlərin keçirilməsi buna əyani sübutdur. Davamlı inkişaf və uğurlarımızda tərəfdaşlarınmızın da rolu önəmlidir. Beynəlxalq Olimpiya Komitəsinin qlobal tərəfdaşı P&G şirkətinin məğrur tərəfdaşlarımız siyahısına daxil olması isə əhəmiyyətli yenilikdir. Paris 2024 Olimpiya Oyunlarında P&G şirkəti ilə birgə addımlayacaq, birlikdə uğur qazanacağıq,” – Çingiz Hüseynzadə vurğulayıb.
Milli Paralimpiya Komitəsinin prezidenti Hidayət Abdullayev Azərbaycan paralimpiyaçılarının müxtəlif Avropa, Dünya və beynəlxalq yarışlarda dəfələrlə yüksək nəticələr əldə etdiyini, ölkə rəhbərliyinin qayğısı nəticəsində paralimpiya hərəkatına marağın daim artdığını diqqətə çatdırıb. “Bu günə kimi idmançılarımız 7 yay və 1 qış paralimpiya oyunlarında 23 qızıl, 19 gümüş və 5 bürünc olmaqla, ümumilikdə, 47 medal qazanaraq, yüksək nəticələr göstəriblər,”- deyən Hidayət Abdullayev paralimpiyaçılarımızın növbəti qələbələr qazanacağına əminliyini və “Procter&Gamble” şirkətinə göstərdiyi dəstəyə və təşəbbüsə görə minnətdarlığını bildirib, Paris 2024 Olimpiya və Paralimpiya Oyunlarında idmançılarımıza böyük qələbələr, uğurlar arzulayıb.
Tədbirdə çıxış edən idmançılar paralimpiyaçı Dürsədəf Kərimova və olimpiyaçı Sənan Süleymanov öz təəssüratlarını iştirakçılarla bölüşüb, göstərilən diqqət və dəstəyin onları daha da güclü etdiyini və Azərbaycanı təmsil etməkdən qürur duyduqlarını bildiriblər.
Qeyd edək ki, indiyədək Azərbaycan idmaçıları Paris 2024 Olimpiya və Paralimpiya Oyunlarında iştirak üçün 14 (8 olimpiya, 6 paralimpiya) lisenziya qazanıblar.
